ဗိုလ်မှူး စိုင်းသိန်းဝင်း၏ အသိပေးကြေညာချက်

http://www.irrawaddyblog.com/2011/05/blog-post_8565.html (Facebook မှ ဗိုလ်မှူးစိုင်းသိန်းဝင်း၏ အွန်လိုင်းအသုံးပြုမှုနှင့် ပတ်သက်သော အသိပေးချက်ကို ပြန်လည်ကူးယူ ဖော်ပြပါသည်။)


Online မိတ်ဆွေများခင်ဗျာ ..
ကျနော့် facebook account နှင့် gmail account များကို password
ခိုးယူခြင်း၊ အချက်အလက်များကို ခိုးယူခြင်းခံနေရပါသည်။ ထိုသို့
ခိုးယူသွားသော သူတို့က ရရှိသွားသော အချက်အလက်များကို အသုံးချ၍ ကျနော့်ကို
သတင်းပေးအဖြစ် အကြပ်ကိုင်စေခိုင်းရန်ပင် ကြိုးစားလာပါသည်။
အလိုက်အထိုက်ပြောဆို၍ သိလာရသောအချက်မှာ ထိုသူတို့သည် Blink Hacker Group
အဖွဲ့ဝင်တစ်ဦး ရောက်ရှိနေထိုင်နေသော တိုင်းပြည်နှင့် သူ၏ အလုပ်အကိုင်ကို
သိလိုသည်ဟု ဆိုပါသည်။ ရန်သူနှင့် အပေးအယူလုပ်ရန် အစီအစဉ်မရှိသောကြောင့်
ထိုအကြောင်းကို သိရလျှင်သိရခြင်း Blink Hacker Group အား
ကျနော်ဆက်သွယ်သတိပေးခဲ့ပါသည်။ BHG မှ ညီငယ်နှင့် တိုင်ပင်ဆွေးနွေးရာ
ကျနော့်အားတိုက်ခိုက်နေသူသည် ပြည်တွင်းမှ IT သမားတစ်ဦးဖြစ်ကြောင်း
သိရသည်။ ၄င်းအပြင် ထိုသူသည် ကိုယ့်ကိုယ်ကို ရုရှားရောက်
အရာရှိတစ်ဦးသဖွယ် ပြောဆိုသုံးနှူန်းခဲ့သော်လည်း mpt server မှ online
တက်နေခြင်းသာဖြစ်ကြောင်း ဖော်ထုတ်တွေ့ရှိရပါသည်။
ပြည်ပအတိုက်အခံအဖွဲ့အစည်းများသို့ အတင်းအဖျင်း email များပေးပို့ခြင်း၊
အထူးသဖြင့် ကျနော့် Email မှ ရရှိသွားသော ဗိုလ်ရဲထက်၏
ဖုန်းနံပတ်ကိုအသုံးချ၍ Patriotic War Veterans of Burma (PWVB) အဖွဲ့သို့
ဗိုလ်ရဲထက် အယောင်ဆောင် ဝါဒဖြန့်သွေးခွဲစာပေးပို့ခြင်းများကိုလည်း
ပြည်တွင်းမှပင် စနစ်တကျ စီမံဆောင်ရွက်ခဲ့ကြောင်းသိရသည်။

ကျနော်သည် ကိုယ့်ယုံကြည်ချက်၊ ခံယူချက်အတွက် နအဖနှင့်
နအဖအလိုတော်ရိများကို မပြေသည့်ရန်ငြိုးဖွဲ့ခဲ့ပါသည်။ ကျနော်ပြည်ပသို့
တိမ်းရှောင်လာကာစတွင် ထိုင်းနိုင်ငံအထိ နအဖသူလျှိုတို့
လိုက်လံထောက်လှမ်းခဲ့ကြောင်း မိတ်ဆွေအဖွဲ့အစည်း၏ တန်ပြန်ထောက်လှမ်းချက်အရ
သိရသည်။ ထိုနအဖသူလျှိုတို့၏ အစီရင်ခံစာပင် ကျနော့်လက်ဝယ်ရှိနေသေးသည်။
ကံကောင်းထောက်မသဖြင့် နအဖသူလျှိုတို့လက်မှ ကျနော် လူပုဂ္ဂိုလ်အားဖြင့်
လွတ်မြောက်ခဲ့သော်လည်း အတိုက်အခံပုဂ္ဂိုလ်များ၏ ထောက်ခံအားပေးမှု၊ ပြည်ပ
မီဒီယာများမှ မကြာခဏ တွေ့ဆုံမေးမြန်းမှုတို့ကြောင့် တီဗီ၊ ရေဒီယိုနှင့်
အင်တာနက်စာမျက်နှာများ၌ မကြာမကြာဖော်ပြခြင်းခံရသည့် ကျနော့်အမည်သည်
နအဖအလိုတော်ရိတို့အတွက် မျက်စိစပါးမွှေးစူးစရာ
ပစ်မှတ်တစ်ခုဖြစ်လာခဲ့ပြန်ပါသည်။ ယခုကျနော့် facebook account နှင့်
gmail ထံမှ ခိုးယူရရှိသွားသော (မိတ်ဆွေအပေါင်းအသင်းများစွာနှင့်
တစ်နှစ်တာကာလပတ်လုံး ခင်မင်ရင်းနှီးစွာ ပြောဆိုခဲ့သော
စကားများ)အချက်အလက်များသည်
နအဖအလိုတော်ရိတို့ရည်မှန်းချက်အောင်မြင်ရန်အတွက်
တစိတ်တပိုင်းအထောက်အကူဖြစ်စေမည်မှာ သံသယ ရှိစရာမလိုသော်လည်း ထို့အတွက်
ကျနော့်အနေဖြင့် စိုးစဉ်းမျှ ပူပန်ခြင်းမဖြစ်ပါ။ လူပဲသေသေ၊ နာမည်ပဲသေသေ
သမိုင်းမှာ ကျနော် နှစ်ဖက်ချွန်သူလျှိုတစ်ဦး အဖြစ်မခံခဲ့ကြောင်း
သက်သေပြဖို့သာ လိုရင်းဖြစ်သည်။

ကျနော်သည် ကိုယ့်ယုံကြည်ချက်၊ ခံယူချက်အတွက် ကိုယ်ပိုင်အရာအားလုံးအား
ရင်းနှီးရဲပေမယ့် ငဲ့ညှာထောက်ထားရမည့်သူများလည်း ရှိနေပြန်သည်။
အားလုံးသိကြသည့်အတိုင်း မြန်မာပြည်တွင်းမှ အင်တာနက် အသုံးပြုသူများမှာ
အီလက်ထရောနစ်အက်ဥပဒေ၏ ခြိမ်းခြောက်မှုကိုလည်း တချိန်တည်းလိုလို
ရင်ဆိုင်နေရပါသည်။ သာဓကမှာ ကျနော့် gmail account ကို မတ်လ ၃၁ ရက်နေ့တွင်
ခိုးယူခြင်းခံခဲ့ရပြီးနောက် ဧပြီလ ၂ ရက်နေ့မှာပင် ပြည်တွင်းမှ
မိတ်ဆွေသူငယ်ချင်းတစ်ဦး ဖမ်းဆီးထိန်းသိမ်းခံလိုက်ရပါသည်။ ထို့နည်းတူပင်
ကျနော့် gmail account ထဲရှိ contact မိတ်ဆွေများကိုလည်း
လိုက်လံတိုက်ခိုက်နေပါသည်။ ကျနော့်အမှတ်ဖြင့်လက်ခံစကားပြောလျှင်ပင်
ထိုလူမှ valid code ရရှိသွားပြီး မိတ်ဆွေတို့၏ gmail ကို
ခိုးယူရရှိသွားနိုင်သည်ဟု သိရပါသည်။ မိတ်ဆွေ သုံးဦးထက်မနည်း password
ပြောင်းလိုက်ရသည်ဟု သိရှိရပြီး တချို့မှာ ၄င်းတို့၏ gmail account
များပင် ဆုံးရှုံးခဲ့ရသည်ဟု ဆိုပါသည်။ ကျနော့်ထံသို့ အနယ်နယ်အရပ်ရပ်မှ
ဆက်သွယ်လာသူများ များပြားလာသည်နှင့်အမျှ ကျနော့် facebook account
မှာလည်း ရန်သူ့ထောက်လှမ်းရေးသမားများအတွက် သတင်းအချက်အလက်စုဝေးရာ
ဘဏ်တိုက်တစ်ခုဖြစ်လာပါသည်။ ယခု ထိုဘဏ်တိုက်ကြီး၏ လုံခြုံရေးကို
ကျနော့်ညံ့ဖျင်းမှုကြောင့် မထိန်းသိမ်းနိုင်တော့ပါ။ ကိုယ်ကိုယ်တိုင်က
ရန်သူ့သတင်းပေးအဖြစ်မခံခဲ့သော်လည်း လုံခြုံမှုမရှိသော ကျနော့်၏ facebook
account မှာ အလိုလိုနေရင်း ရန်သူ့သတင်းပေးဖြစ်နေပါပြီ။ ထို့ကြောင့်
ကျနော်ယခု အသုံးပြုနေသော facebook account အား terminate
လုပ်ရတော့မည်ဖြစ်ကြောင်း မိတ်ဆွေအပေါင်းအား အသိပေးကြေငြာအပ်ပါသည်။

ခင်မင်လေးစားစွာဖြင့်…

စိုင်းသိန်းဝင်း (၁၇.၅.၂၀၁၁)